rss

وزیر خارجہ مائیکل آر پومپئو کا ‘سلیکٹ یوایس اے انویسٹمنٹ کانفرنس 2018’ سے خطاب

English English, Français Français, हिन्दी हिन्दी, Русский Русский, Português Português, Español Español

برائے فوری اجرا
22 جون 2018
گیلارڈ نیشنل ریزارٹ اینڈ کنونشن سنٹر
اوکسن ہل، میری لینڈ

 

وزیرخارجہ پومپئو: سبھی کو صبح بخیر۔ میں آپ کے لیے تمام 31 ذائقے پیش نہیں کروں گا کیونکہ یہ میرے تیار شدہ بیان میں شامل نہیں ہیں۔ کھل کر کہوں تو میں نے آئس کریم بھرنے کے کام سے بہت کچھ سیکھا، ایسی باتیں جن سے آپ اچھی طرح واقف ہیں، کڑی محنت، سچ بولنا، ہر لمحے بہترین کام کرنا اور اکثر یہ چیزیں آپ کو زندگی میں اور اس ٹیم کے ساتھ فائدہ دیتی ہیں جس کا آپ حصہ ہوتے ہیں یا ان سے آپ کو کامیاب کاروبار میں مدد ملتی ہے۔

اس قدر مشفقانہ تعارف پر میں وزیر راس کا مشکور ہوں۔ آپ تمام لوگوں، دور دراز سے یہاں آنے والے عالمی سرمایہ کاروں اور امریکی کاروباری طبقے سے تعلق رکھنے والے دوستوں کا شکریہ جو یہاں موجود ہیں۔

تمام گورنر حضرات اور ریاستی سطح کے نمائندوں کا بھی شکریہ جو امریکہ بھر سے یہاں آئے۔ آپ کی آمد نے اس پروگرام کو واقعتاً خاص بنا دیا ہے۔

جیسا کہ  ولبر نے کہا، میں کانگریس کا رکن اور سنٹرل انٹیلی جنس ایجنسی کا ڈائریکٹر رہا ہوں مگر دل سے میں خود کو اب بھی مینوفیکچرنگ سے وابستہ شخص سمجھتا ہوں۔ ڈیڑھ دہائی تک میں نے کنساس کے شہر وچیٹیا میں دو مینوفیکچرنگ کمپنیاں چلائیں۔ پہلا ایروسپیس مینوفیکچرنگ کا کاروبار مشینوں سے متعلق تھا۔ ہم مشینیں بناتے تھے، ہمارے پاس ملیں اور خراد تھی۔ ہم اپنے بنائے پرزہ جات بوئنگ، لاک ہیڈ، سیسنا، ریتھیئون اور گلف سٹریم سمیت دنیا بھر میں ہوائی جہازوں کی صنعت سے وابستہ مینوفیکچرنگ اداروں کو فروخت کرتے تھے۔ یہ کاروبار ترقی کرتا ہوا 100 ملین ڈالر سالانہ تک پہنچ گیا۔

تب ایک ایسی کمپنی کے لیے میری خدمات لی گئیں جس کا کام اس سے ملتا جلتا تھا مگر یہ تیل کے کنوؤں سے متعلق سازوسامان فروخت کرتی تھی۔ ہیلی برٹن اور شلم برجر جیسی کمپنیاں اور تیل کے کنوؤں سے متعلق چند بڑے پیداکار ہمارے گاہک تھے۔ کاروبار میں میرے ہر لمحے میں  ان کمپنیوں کو عالمی تعاون سے فائدہ ہوا۔

ہمیں غیرملکی براہ راست سرمایہ کاری سے براہ راست فائدہ پہنچا جس سے ان نوکریوں کی معاونت ہوئی جیسی  ہماری پاس وچیٹیا کنساس میں تھیں اور اب امریکہ میں ان کی تعداد 7 ملین سے تجاوز کر گئی ہے۔ یہ امریکہ اور امریکی کارکنوں نیز سرمایہ کاروں کے لیے بھی اچھی خبر ہے۔

تو آپ سبھی یہ کہہ رہے ہیں کہ وزیرخارجہ آج یہاں کیوں موجود ہیں۔ آپ نے وزیر خزانہ اور وزیر تجارت سے سنا ہو گا۔ مگر آپ کو علم ہونا چاہیے کہ عالمگیر کاروبار کا دارومدار کامیاب عالمی تعلقات پر ہوتا ہے۔ آپ کو ایسی جگہوں کی تلاش ہے  جہاں آپ بہترین صلاحیت اور انتہائی قابل لوگوں تک پہنچ سکیں جو انتہائی شفاف ہوں، جہاں قانون کی حکمرانی ہو اور جہاں نجی شعبے میں عالمگیر برانڈ کے لیے بہت کچھ ہو اور جہاں مجھے اپنی سرمایہ کاری سے بہترین منافع مل سکے۔

یہ بات آپ کے لیے حیرانی کا باعث نہیں ہو گی کہ مجھے پورا یقین ہے کہ میں یہاں اس صبح ثابت کر سکتا ہوں کہ یہ ریاست ہائے متحدہ امریکہ ہے۔ (تالیاں) ناصرف یہ ہمارا ملک ہے بلکہ  یہ بہترین وقت بھی ہے۔ یہ سرمایہ کار کی حیثیت سے یہاں آنے، اپنا کاروبار اور اپنے لوگ یہاں لانے کا بہترین موقع ہے۔

پہلی بات یہ کہ ہمارے پاس بہت سے فوائد ہیں۔ جب میں نے دو چھوٹے سے کاروبار چلائے تو مجھے براہ راست یہ مشاہدہ ہوا۔ ہمارے پاس کاروباری نظامت اور اختراع کا ناقابل یقین کلچر ہے۔ ہم اشیا اور خدمات کے حوالے سے دنیا کی سب سے بڑی منڈی ہیں۔ ہمارے پاس بے پایاں سیاسی استحکام اور قانون کی ایسی حکمرانی ہے جس کا کوئی مقابلہ نہیں۔ ہمارے پاس دنیا کے بہترین کالج، یونیورسٹیاں اور ٹیکنالوجی کے مراکز ہیں۔ ہم نے اپنے  عالمگیر شراکت داروں سے مل کر ایک مالیاتی نظام قائم کر رکھا ہے اور ہمارے پاس نجی شعبے کے ذریعے چلتا ایک اقتصادی نمونہ ہے۔

یہ اثاثے کئی سال تک امریکہ کے لیے لازمہ حیات رہے ہیں۔ صدر ٹرمپ کی پالیسیاں، ان کی معاشی پالیسیوں نے ہمارے فوائد کو خوشحالی کے لیے پہلے سے کہیں بڑی قوت میں تبدیل کر دیا ہے۔ دنیا میں امریکہ کی پسپائی کے حوالے سے ایک مفروضہ پایا جاتا ہے اور مجھے آپ کو یہ بتانا ہے کہ یہ محض مفروضہ ہی ہے۔ صدر ٹرمپ کا ایجنڈا انتہائی کاروبار نواز اور عالمگیر تجارت کے لیے اس قدر سازگار ہے جس کی  سابقہ صدور کے عہد میں کوئی مثال نہیں ملتی۔ اس نے امریکی معاشی منظرنامے کو تبدیل کر کے رکھ دیا ہے اور آپ کی کمپنی بھی اس کا حصہ بننا چاہے گی۔

ہم نچلے نجی و کاروباری محصولات کی شرح کے حوالے سے فوائد کا مشاہدہ کر سکتے ہیں، بہت بڑی تعداد میں ضوابط کم کیے گئے ہیں۔ جب میں اپنے چھوٹے سے کاروبار کا مالک تھا تو ہمارے لیے یہ ضوابط کاروباری ترقی کی راہ میں بہت بڑی رکاوٹ تھے۔ ہم نے مقامی سطح پر توانائی کی پیداوار شروع کی ہے جس کے بارے میں وزیر پیری بات کر چکے ہیں اور ہمیں کاروباری سرگرمیوں میں اس حکومت کی واضح حمایت حاصل ہے جو کاروبار کے لیے واقعتاً کھلی پالیسی پر عمل پیرا ہے۔

جیسا کہ اس ماہ کے آغاز میں لیری کڈلو نے کہا تھا ‘امریکہ میں کاروبار کے خلاف جنگ ختم ہو چکی ہے’

‘کامیابی کے خلاف جنگ ختم ہو چکی ہے (اور) توانائی کے خلاف جنگ ختم ہو چکی ہے’ (تالیاں)

اداروں کے پراعتماد مالکان اچھی کارکردگی دکھانے کو تیار ہیں۔ ملک میں ہر طرح کی آبادی میں بیروزگاری کی شرح کم ترین سطح پر ہے اور یہ نئی پالیسیوں اور تبدیل شدہ طرزعمل کے فوائد ہیں جن سے امریکی اور عالمگیر خوشحالی کے نئے دور کا آغاز ہوا ہے۔

صدر کی پالیسیوں کے نتیجے میں عالمی کمپنیاں اور سرمایہ کار پہلے ہی پوری رفتار سے یہاں آ رہے ہیں۔ آپ یہ بات یقینی بنانا چاہیں گے کہ آپ بھی فوائد کے حصول کے لیے یہاں موجود ہوں۔

مثال کے طور پر جرمن کینڈی کمپنی کی ‘ہیریبو آف امریکہ’ نامی ذیلی کمپنی مٹھائی کی صنعت سے متعلق اپنا سب سے بڑا کارخانہ قائم کر رہی ہے اور یہ پلیزنٹ پریری وسکونسن میں پہلا امریکی مینوفیکچرنگ پلانٹ ہو گا۔

یہ 242 ملین ڈالر کا منصوبہ ہے جس سے یہاں امریکہ میں اندازاً 400 نئی نوکریاں پیدا ہوں گی اور سکاٹ واکر کا کہنا ہے کہ یہ نئی تنصیب وسکونسن کی تاریخ میں کسی غیرملکی کمپنی کی جانب سے سب سے بڑی سرمایہ کاری ہو گی۔ انہوں نے مجھ سے وعدہ کیا ہے کہ ایسی مزید سرمایہ کاری بھی آئے گی۔

مشرقی ساحل پر شمالی کیرولائنا کا علاقہ ریلی ریاست میں ٹیکنالوجی اور اختراع کا مرکز ہو گا جسے انڈیا کی آئی ٹی اور کنسلٹنگ کمپنی انفوسیز تعمیر کرے گی۔

انفوسیز نے آئندہ دو برس کے عرصہ میں امریکہ میں 10 ہزار نئی نوکریاں پیدا کرنا ہیں۔ یہ کمپنی 2021 تک ریلی میں اپنے مرکز میں 2000 امریکیوں کی خدمات حاصل کرے گی۔

اس کمپنی  نے بھرتی، تربیت اور مستقبل کی افرادی قوت کی خدمات لینے کے لیے ایک مخصوص پروگرام شروع کرنے کے لیے شمالی کیرولائنا کے کمیونٹی کالج سسٹم سے بھی شراکت قائم کی ہے۔ ہمیں خوشی ہے کہ اس وقت انفوسیز کے نمائندے بھی ہمارے ساتھ یہاں موجود ہیں۔

ٹرمپ انتظامیہ ایسا کاروباری ماحول ترتیب دینے کے لیے پرعزم ہے جس سے اس طرح کی خوشحالی جنم لیتی رہے گی۔ اس سے بہت کچھ مراد ہے کیونکہ میں وزیرخارجہ کی حیثیت سے اپنے کردار میں یہ سمجھتا ہوں کہ معاشی طور پر مضبوط امریکہ ہی اپنے اتحادیوں سے کیے وعدے پورے کر سکتا ہے اور جارح ممالک کو عالمگیر بہتری کی راہ میں رکاوٹ پیدا کرنے سے روک سکتا ہے۔

جب ممالک معاشی کامیابی کے لیے ایک دوسرے سے تعاون کرتے ہیں تو ہمارے اتحاد تقویت پاتے ہیں۔ خوشحال شراکت داروں میں سلامتی کے حوالے سے حقیقی مسائل کا سامنا کرنے کی بہتر اہلیت پائی جاتی ہے۔ یہ ایسے مسائل ہیں جو ہم سب کو درپیش ہیں اور ان سے ہر ملک کو خطرات لاحق ہیں۔ یہ خطرات حقیقی ہیں خواہ یہ دہشت گردی ہو، غیرقانونی مہاجرت ہو یا یہ سرکش ریاستی کردار ہوں، ہمیں، ہمارے شراکت داروں اور اتحادیوں کو یہ خطرات پرے دھکیلنے کے لیے مضبوط معاشی ترقی درکار ہے۔

دفتر خارجہ کا تجارت کو سہولت دینے میں اہم کردار ہے جس سے امریکی عوام اور ہمارے شراکت دار دونوں کو فائدہ پہنچتا ہے۔ واشنگٹن ڈی سی میں ہمارے پاس 200 اقتصادی اور کاروباری افسر ہیں جبکہ 1500 سے زیادہ معاشی افسر دنیا بھر میں 190 سے زیادہ ممالک میں سرگرم عمل ہیں۔

ان میں بہت سے خاص طور پر عالمی کاروبار اور سرمایہ کاروں کی عالمگیر تجارتی جگہوں کی جانب رہنمائی اور یہاں امریکہ  میں ہماری منڈی سے واقفیت پیدا کرنے میں مصروف ہیں۔

ان تک پہنچیں۔ وہ آپ کے سوالات کا جواب دیں گے، آپ کے خدشات کا ازالہ کریں گے اور وہ آپ کا امریکی حکومت میں سرمایہ کاری کے ماہرین سے رابطہ کروا سکتے ہیں۔ یہ دفتر خارجہ کا ایک اہم کردار ہے جس کی سربراہی کا اعزاز اب مجھے حاصل ہوا ہے۔

مجھے بے حد خوشی ہے، میں جانتا ہوں کہ ہمارے بہت سے سفارتی سربراہان، ہمارے سینئر سفراء اور دیگر عہدیدار یہاں موجود ہیں۔ میں آپ سبھی کی حوصلہ افزائی کرتا ہوں کہ اپنے ملک میں ان سے رابطہ قائم کریں۔ وہ جانتے ہیں کہ یہاں امریکہ میں اور جن ممالک میں وہ خدمات انجام دے رہے ہیں، تجارت میں مدد کی فراہمی امریکہ کی ترجیح ہے۔

ہم ان جگہوں پر اپنے غیرملکی تجارتی خدمت کے شراکت داروں کی ہمراہی میں کام کر رہے ہیں۔ 75 ممالک میں یہ بذات خود موجود ہیں۔ اتنی بڑی تعداد میں موجودگی اور قریبی ربط سے دنیا بھر میں خوشحالی کو ترقی دینے کی بابت امریکی حکومت کے یکجا تصور اور لگن کا اظہار ہوتا ہے۔ ایسی کوششوں کا دائرہ غیرملکی کمپنیوں تک پھیلایا گیا ہے جیسا کہ آپ کو ضرورت ہے اور ان کی بنیاد ان ٹینڈرز پر ہے جو یہاں امریکہ میں تیار ہوتے ہیں۔

امریکی کاروباری طبقے سے مجھے یہ کہنا ہے کہ ہمارے سفارت کار آپ کی مدد کے لیے بھی تیار ہیں۔ اگر آپ کاروباری مقاصد کے لیے بیرون ملک جاتے ہیں تو ہمارے سفارت خانوں سے مدد لیں۔ وہاں جائیں اور ہمارے لوگوں سے ملیں۔ ہمارے دروازے کھلے ہیں۔ ہم منڈی کی صورتحال پر آپ کی رہنمائی کر سکتے ہیں اور دنیا ک ہر ملک میں کاروباری ضابطوں کے حوالے سے آپ کی رہنمائی کر سکتے ہیں۔

میں ایک اور بات پر زور دینا چاہوں گا جو میرے خیال میں آپ کے علم ہونا بہت ضروری ہے۔ امریکی معاشی قیادت کی بنیاد شفافیت اور یکساں مواقع جیسے اصولوں پر ہے اور اس ہدف کا حصول دفتر خارجہ کا مقصد ہے۔

ہم دنیا بھر میں امریکی انٹیلکچوئل پراپرٹی حقوق کے حاملین کے مفادات کا تحفظ کریں گے اور آپ کو یقین ہونا چاہیے کہ ہم آپ کی ایجاد کو چوری، کاپی رائٹ کی خلاف ورزی اور دیگر غلط استعمال سے محفوظ رکھنے کے لیے کام کریں گے۔

اپنی بات کے اختتام پر میں آپ کو یقین دلاتا ہوں کہ امریکہ کاروبار اور اختراع کے حوالے سے پوری دنیا میں سب سے بہتر جگہ ہے۔

ہم عالمی سرمایہ کاروں کا خیرمقدم کرتے ہیں۔ ہمیں امید ہے کہ آپ کو سرمایہ کاری کے اچھے مواقع میسر آئیں گے۔ میں نے گزشتہ رات بار پوری طرح بھری ہوئی دیکھیں۔ میں وہاں سے گزر رہا تھا۔ (قہقہہ)

ہمیں بتائیں کہ ہم آپ کی کیسے مدد کر سکتے ہیں۔ امریکہ میں اپنے وقت سے لطف اٹھائیں۔ اپنی سرمایہ کاری لائیں۔ ہم آپ کا خیرمقدم کرتے ہیں۔

اس حوالے سے میرے جذبات کابینہ میں اپنے ساتھی وزیر اکوسٹا، منوشن، وزیر پیری اور وزیر راس جیسے ہیں۔ یہ سب ایک سے خیالات کے مالک ہیں۔ ہم یہ امر یقینی بنانا چاہتے ہیں کہ امریکہ میں آپ کی سرمایہ کاری کامیاب رہے۔ شکریہ، خدا آپ کا حامی و ناصر ہو۔ امید ہے کہ امریکہ میں آپ کا قیام بہت اچھا رہے گا۔ (تالیاں)


یہ ترجمہ ازراہِ نوازش فراہم کیا جا رہا ہے اور صرف اصل انگریزی ماخذ کو ہی مستند سمجھا جائے۔
تازہ ترین ای میل
تازہ ترین اطلاعات یا اپنے استعمال کنندہ کی ترجیحات تک رسائی کے لیے براہ مہربانی اپنی رابطے کی معلومات نیچے درج کریں