rss

وائٹ ہاؤس میں افطار ڈنر 2019 کے موقع پر صدر ٹرمپ کا خطاب سٹیٹ ڈائننگ روم

العربية العربية, English English, Русский Русский, Français Français, हिन्दी हिन्दी

وائٹ ہاؤس
دفتر برائے سیکرٹری اطلاعات
برائے فوری اجرا
13 مئی  2019


8:37 شام

صدر: آپ سبھی کا بے حد شکریہ اور شام بخیر۔

اس نہایت خاص وقت میں جب دنیا بھر کے مسلمان رمضان منا رہے ہیں، یہاں وائٹ ہاؤس میں آپ کا خیرمقدم کرنا میرے لیے بہت بڑا اعزاز ہے۔

نائب صدر مائیک پنس کی یہاں موجودگی ہمارے لیے خوشی کا باعث ہے۔ مائیک کہاں ہیں؟ جی مائیک۔ (تالیاں) مائیک، ہم نے کڑی محنت کی ہے، ایسا ہی ہے؟ اور ہم جیسے نتائج حاصل کر رہے ہیں ماضی میں بہت کم لوگوں نے ایسا کیا ہے۔ ہم بحیثیت ملک واقعی بہت اچھے جا رہے ہیں اور ہمیں اپنے ملک پر بے حد فخر ہے۔ مائیک، اس زبردست کام کے لیے آپ کا شکریہ۔

میں وزیر منوچن کا شکریہ بھی ادا کرنا چاہتا ہوں۔ سٹیو (تالیاں) بہت اچھے سٹیو۔ سٹیو حال ہی میں چین کے دورے سے واپس آئے ہیں۔ ہم قریباً تین یا چار ہفتوں میں آپ کو بتائیں گے کہ آیا یہ دورہ کامیاب رہا یا نہیں۔ آپ کو کبھی اندازہ نہیں ہوتا، ایسا ہی ہے؟ مگر مجھے محسوس ہو رہا ہے کہ یہ بہت کامیاب رہا۔

قائم مقام وزیر پیٹرک شیناہن، پیٹرک، آپ کا بے حد شکریہ (تالیاں)

میں یہاں موجودگی پر وزیر ایلکس ایزر کا بھی مشکور ہوں۔ ایلکس کہاں ہیں؟ (تالیاں)۔ 51 برس میں پہلی مرتبہ دواؤں کی قیمتیں نیچے آئی ہیں ۔۔۔ یہ نیچے آ گئی ہیں۔ 51 سال میں پہلی مرتبہ۔ ایلکس، آپ نے بہت بڑا کام کیا ہے۔ یہ واقعتاً شاندار ہے۔

میں امریکی فوج میں شامل ہمارے ایک بڑے مذہبی پیشوا کا خاص طور پر خیرمقدم کرتا ہوں جنہوں نے اس ماہ کے آغاز میں روز گارڈن میں ہمارے ساتھ ایک دلگداز دعا کروائی تھی ۔ یہ امام ایگبر ہیں۔ آپ کا شکریہ۔ (تالیاں) شکریہ امام۔ آپ کا بے حد شکریہ۔ آپ نے بہت زبردست کام کیا ہے۔ یہ نہایت دلپذیر کام تھا۔

آج شب ہم بڑے مسلم ممالک کی نمائندگی کرنے والے بہت سے سفیروں اور سفارتی عملے کے ارکان کی میزبانی پر ممنون ہیں۔ ہمیں اس قدر بڑی تعداد میں معزز شخصیات اور بہت سے دوستوں کے ساتھ اس خاص کھانے میں شرکت کی  خوشی ہے۔ اس جگہ میرے بہت سے دوست اور دنیا بھر سے عزیز شریک کار موجود ہیں۔ آپ کی موجودگی ہمارے لیے اعزاز ہے اور آپ کی دوستی نے ہمیں مضبوط بنایا ہے۔ آپ سب کی یہاں موجودگی کا بے حد شکریہ۔ ہم یہ غیرمعمولی شام اکٹھے گزاریں گے۔

رمضان یہاں امریکہ اور دنیا بھر میں مسلمانوں کے لیے مقدس مہینہ ہے۔ عبادت کے اس مہینے میں مسلمان طلوع آفتاب سے غروب آفتاب تک روزہ رکھتے ہیں اور خدا سے اپنی وابستگی مضبوط بنانے کے لیے عبادت اور روحانی زندگی پر توجہ مرکوز کرتے ہیں۔

رمضان خیرات، دوسروں کی مدد اور ہمارے ساتھی شہریوں کی خدمت کرنے کا وقت ہے۔ رمضان ایک نہایت خاص وقت ہوتا ہے۔ یہ خاندانوں، ہمسایوں اور معاشرتی ارکان کی حیثیت سے ایک دوسرے سے قریب آنے کا موقع ہے۔ رمضان وہ وقت ہے جب لوگ امید، رواداری اور امن کی جستجو میں باہم متحد ہوتے ہیں۔

اسی جذبے کے تحت آج ہم افطار کے لیے جمع ہوئے ہیں۔ یہ رمضان کا روایتی کھانا ہے جس سے روزہ کھولا جاتا ہے۔

آج شام ہمارے دل ان مذہبی پیروکاروں کے ساتھ بھی ہیں جنہوں نے حالیہ ہفتوں میں بہت سی آزمائشیں اور تکالیف جھیلیں۔ یہ بہت سخت وقت تھا۔ ہمارے دل ان مسلمانوں کے لیے غم کے جذبات سے بھرے ہیں جو نیوزی لینڈ میں اپنی مساجد میں مارے گئے۔ اسی طرح سری لنکا، کیلیفورنیا اور پٹس برگ میں قتل ہونے والے عیسائیوں، یہودیوں اور خدا کے دیگر بندوں لیے بھی ہمارے یہی جذبات ہیں۔

ان کی متبرک یاد میں ہم دہشت گردی اور مذہبی بنیاد پر مظالم جیسی برائیوں کو شکست دینے کا عہد کرتے ہیں تاکہ تمام لوگ خوف کے بغیر عبادت کر سکیں، خطرے کے بغیر دعا مانگ سکیں  اور اس عقیدے کے مطابق زندگی گزار سکیں جو ان کے دل کی آواز ہے۔

ہم خدا کا شکر ادا کرتے ہیں کہ امریکہ اس اعتقاد پر قائم کردہ جگہ ہے کہ یہاں تمام مذاہب کے لوگ تحفظ اور آزادی کے ماحول میں اکٹھے زندگی گزار سکتے ہیں۔

اس شام  جب ہم اکٹھے کھانے کی تیاری کر رہے ہیں تو آئیے ہم آہنگی اور امن کے مستقبل کے لیے دعا کریں۔ آئیے خدا سے التجا کریں کہ وہ ہم پر اپنی رحمت و برکت ہمیشہ نچھاور کرتا رہے۔ آئیے اپنے بچوں اور دنیا کے تمام لوگوں کے لیے امید اور خیرسگالی سے معمور مستقبل کی تعمیر کے لیے کام کریں۔

اس کے ساتھ ہی میں امریکہ اور دنیا بھر میں ہر مسلمان کو رمضان کریم کی مبارک باد دینا چاہوں گا۔ یہ بے حد اہم ہے۔ میں یہاں موجودگی پر آپ سبھی کا شکریہ ادا کرنا چاہتا ہوں۔ آپ بہت خاص لوگ ہیں۔ یہ بہت بڑا اعزاز ہے۔ اب ہم اچھا کھانا کھائیں گے۔ اگر یہ اچھا نہ ہوا تو اس کی ذمہ داری مجھ پر ہو گی، ٹھیک ہے؟ (قہقہہ) جی اس کا ذمہ دار مجھے ٹھہرایے۔

آپ کا بے حد شکریہ۔ آپ سبھی کا شکریہ۔ شکریہ (تالیاں)

اختتام

8:42 شام


یہ ترجمہ ازراہِ نوازش فراہم کیا جا رہا ہے اور صرف اصل انگریزی ماخذ کو ہی مستند سمجھا جائے۔
تازہ ترین ای میل
تازہ ترین اطلاعات یا اپنے استعمال کنندہ کی ترجیحات تک رسائی کے لیے براہ مہربانی اپنی رابطے کی معلومات نیچے درج کریں